اسلام آباد نفیس بھٹہ سے سوشل میڈیا پر پاکستانی پاسپورٹ سے متعلق گردش کرنے والی مختلف افواہوں پر ڈائریکٹوریٹ جنرل آف امیگریشن اینڈ پاسپورٹس نے سخت نوٹس لیتے ہوئے واضح تردیدی بیان جاری کردیا۔
ترجمان محکمہ امیگریشن اینڈ پاسپورٹس کے مطابق پاکستانی پاسپورٹ کے فرنٹ کور پیج میں کسی بھی قسم کی تبدیلی نہیں کی گئی۔ زیرِ گردش تصاویر جعلی ہیں اور ان کا حقیقت سے کوئی تعلق نہیں۔محکمہ کے مطابق قومی پاسپورٹ میں صرف چند سکیورٹی فیچرز اپ گریڈ کیے گئے ہیں،
تاہم اس کے ڈیزائن یا رنگ میں کوئی تبدیلی نہیں کی گئی۔ترجمان نے کہا کہ پاسپورٹ سے متعلق پراپیگنڈہ پھیلانے والے عناصر کے خلاف قانونی کارروائی عمل میں لائی جائے گی۔
شہریوں سے اپیل ہے کہ وہ غیر مصدقہ خبروں پر یقین نہ کریں اور معلومات کے لیے صرف محکمہ امیگریشن اینڈ پاسپورٹس کے سرکاری ذرائع پر بھروسہ کریں۔ذرائع کے مطابق حکومت مستقبل میں پاکستانی پاسپورٹ کے نئے ایڈیشن پر کام کر رہی ہے
جس میں جدید ترین سیکیورٹی فیچرز شامل کیے جائیں گے، جبکہ اندرونی صفحات پر پاکستان کے تاریخی و ثقافتی ورثے کی تصاویر بھی شامل کرنے کی تجویز زیرِ غور ہے۔
جڑے رہیں ملکی و غیر ملکی تجزیاتی تازہ ترین خبروں کے لیے — ہر خبر کا رخ سچ کی جانب نیوز سینٹرز پاکستان
