محکمۂ موسمیات کی رپورٹ
محکمۂ موسمیات کے مطابق کراچی میں آج موسم دھوپ بھرا رہے گا، درجہ حرارت دن کے وقت 37 ڈگری سینٹی گریڈ تک جا سکتا ہے، جبکہ شام کے وقت 30 ڈگری تک کمی متوقع ہے۔ ہوا میں نمی کا تناسب قدرے زیادہ رہنے سے حبس کا احساس برقرار رہے گا۔
ادھر پنجاب اور بالخصوص لاہور، فیصل آباد، شیخوپورہ اور گوجرانوالہ میں فضائی آلودگی اور سموگ میں اضافے کی اطلاعات ہیں، جس کے باعث شہریوں کو ماسک کے استعمال اور غیر ضروری باہر نکلنے سے گریز کی ہدایت کی گئی ہے۔
بالائی علاقوں میں مطلع جزوی طور پر ابرآلود رہے گا، جب کہ گلگت بلتستان اور کشمیر کے چند مقامات پر ہلکی بارش کا امکان ظاہر کیا گیا ہے۔
مجموعی طور پر، ملک بھر میں موسم خشک، دن کے اوقات میں گرم اور رات کے وقت معتدل رہنے کی پیشگوئی کی گئی ہے۔
