اسلام آباد نیوز ڈیسک نفیس بھٹہ سے
نجی ٹی وی چینل کو دیے گئے انٹرویو میں وفاقی وزیرِ دفاع خواجہ آصف نے کہا ہے کہ غزہ میں پاکستانی افواج بھیجنے سے متعلق ابھی کوئی حتمی فیصلہ نہیں ہوا، البتہ اس معاملے پر غور جاری ہے۔
وزیر دفاع کا کہنا تھا کہ غزہ ہمارے دل کے قریب ہے، وہاں کے مظلوم عوام کے ساتھ پاکستان کا گہرا دینی و انسانی تعلق ہے۔ اگر اسلامی دنیا کوئی مشترکہ اقدام کرتی ہے اور پاکستان اس میں شامل ہوتا ہے تو یہ ہمارے لیے باعثِ فخر ہوگا کہ ہم اپنے فلسطینی بھائیوں کی مدد اور تحفظ کے لیے کردار ادا کر سکیں۔
خواجہ آصف نے واضح کیا کہ حکومتِ پاکستان اس معاملے کو ادارتی و پارلیمانی مشاورت کے بعد ہی حتمی شکل دے گی، تمام اتحادی ممالک، پارلیمنٹ اور قومی سلامتی کے اداروں کو اعتماد میں لیا جائے گا۔
ذرائع کے مطابق وزارتِ دفاع اور وزارتِ خارجہ دونوں اسلامی تعاون تنظیم (OIC) اور اقوام متحدہ کی سطح پر امن فورس کی ممکنہ تشکیل اور پاکستان کے ممکنہ کردار پر غور و خوض کر رہے ہیں۔
سیاسی تجزیہ کاروں کا کہنا ہے کہ اگر پاکستان کسی اسلامی یا بین الاقوامی امن مشن کا حصہ بنتا ہے تو یہ نہ صرف سفارتی سطح پر بڑی پیش رفت ہوگی بلکہ مسلم دنیا کے اتحاد کی نئی علامت بھی بن سکتی ہے۔
تاہم فیصلہ پارلیمانی منظوری، اتحادی مشاورت اور قانونی تقاضوں کی تکمیل سے مشروط ہوگا۔
جڑے رہیں ملکی و غیر ملکی تجزیاتی تازہ ترین خبروں کے لئے— ہر خبر کا رُخ سچ کی جانب نیوز سینٹرز پاکستان
