سرِ راہ
ارشد مزدور کی فریادانصاف کے دروازے کب کھلیں گے۔۔۔؟
تحریر: ڈاکٹر ملک نفیس بھٹہ
لاہور کے مصروف علاقے راوی روڈ کی سبز منڈی میں پیش آنے والا ایک واقعہ کئی سوالات کو جنم دے رہا ہے۔ایک غریب، محنت کش اور دیہاڑی دار مزدور ارشد کی جانب سے لگائے گئے الزامات نہ صرف تشویش ناک ہیں
بلکہ قانون نافذ کرنے والے اداروں کی کارکردگی پر بھی سوالیہ نشان چھوڑتے ہیں۔
متاثرہ شہری ارشد کے مطابق وہ ایک دودھ کی دکان پر ملازمت کرتا ہے اور روزمرہ کی طرح خالی برتن لینے کے لیے گیا تھا
کہ اس دوران ایک درجن کے قریب افراد نے اسے زبردستی اپنے ساتھ لے جا کر ایک مقام پر باندھ دیا اور ڈنڈوں کے ساتھ تشدد کا نشانہ بنایا۔
ارشد کا دعویٰ ہے کہ اس پر ہونے والا تشدد کئی گھنٹوں تک جاری رہا جبکہ اس نے کسی قسم کی مزاحمت بھی نہیں کی۔
ارشد کے مطابق واقعہ کے بعد وہ انصاف کی امید لیے پولیس چوکی سبزی منڈی پہنچا،لیکن اس کا کہنا ہے کہ پولیس نے نہ صرف اس کی شکایت پر مؤثر کارروائی سے گریز کیا
بلکہ ملزمان کی نشاندہی کے لیے
ساتھ جانے سے بھی انکار کر دیا متاثرہ مزدور کا یہ بھی کہنا ہے کہ اسے قوی شبہ ہے
کہ کہیں نہ کہیں ملزمان کو غیر معمولی رعایت دی جا رہی ہے
جس کے باعث اب تک کوئی عملی کارروائی سامنے نہیں آ سکی۔
اگر ارشد کے الزامات درست ہیں تو یہ معاملہ محض ایک فرد پر تشدد کا نہیں بلکہ قانون کی عملداری اور شہریوں کے بنیادی حقوق کا مسئلہ بن جاتا ہے۔
ایک ایسے معاشرے میں جہاں مزدور طبقہ پہلے ہی معاشی مشکلات اور سماجی مسائل کا شکار ہے
وہاں اگر اسے انصاف کے حصول میں بھی رکاوٹوں کا سامنا کرنا پڑے تو یہ صورتحال لمحۂ فکریہ ہے۔
یہ امر بھی قابل غور ہے کہ قانون کسی شخص کو اپنے ہاتھ میں لینے کی اجازت نہیں دیتا۔
اگر کسی کے خلاف شکایت یا تنازع موجود تھا تو اس کا حل قانونی راستوں سے نکالا جانا چاہیے تھا، نہ کہ تشدد، زبردستی اور مبینہ حبسِ بے جا کے ذریعے۔
حکومت پنجاب، اعلیٰ پولیس حکام اور متعلقہ تفتیشی اداروں کے لیے ضروری ہے کہ وہ اس معاملے کا غیر جانبدارانہ نوٹس لیں،
واقعہ کی مکمل تحقیقات کروائیں، متاثرہ شہری کا مؤقف سنیں، سی سی ٹی وی فوٹیج اور دیگر شواہد کا جائزہ لیں اور حقائق سامنے آنے پر قانون کے مطابق کارروائی عمل میں لائیں۔
انصاف کا تقاضا یہی ہے کہ نہ کسی بے گناہ کو سزا ملے اور نہ کسی ذمہ دار کو قانون سے بالاتر سمجھا جائے۔
ارشد جیسے بے شمار مزدور روزانہ اپنی محنت سے معاشرے کا پہیہ چلاتے ہیں۔
ان کی عزت، جان اور تحفظ ریاست کی ذمہ داری ہے۔ اگر ایک مزدور اپنی فریاد لے کر تھانے کے دروازے پر کھڑا ہو
اسے انصاف کی امید نہ ملے تو یہ صرف ایک فرد کا مسئلہ نہیں بلکہ پورے نظام کے لیے ایک سنجیدہ سوال ہے۔
PRIME NEWS AGENCY
City Crime News International (CCNI)
ہر خبر کا رُخ سچ کی جانب
جڑے رہیں ملکی و غیر ملکی تجارتی، تجزیاتی، انوسٹی گیٹو اور تازہ ترین خبروں کے لیے۔
NEWS CENTERS PK The Supreme Command of Truth Journalism.
متعلقہ حکام سے اپیل ہے کہ اس واقعہ کی شفاف تحقیقات کو یقینی بنایا جائے تاکہ حقیقت سامنے آ سکے اور عوام کا اعتماد قانون نافذ کرنے والے اداروں پر برقرار رہے۔
